WNWN Food Labs (Erresuma Batuak), zeinak kakaorik gabeko txokolatea landare-jatorriko osagaietatik abiatuta egiten duen, irabazi du foodtech-startupentzako Culinary Action! On The Road nazioarteko ekintzailetza-programaren Londresen ospatu den geldialdia, University College London kidearekin antolatua. Johnny Drain doktorea, startuparen sortzaileetako bat, oso eskertuta agertu da: “Culinary Action!-en geldialdi hau irabazteak jende gehiagorengana iristen lagunduko digu”.

Pierre-Jean Hanard, ekintzailetzako hezkuntzako irakasle elkartua eta liderra University College London-en; Asier Alea, Basque Culinary Centerreko Garapen Globaleko zuzendariak eta Ander Lopez,  Basque Culinary Centerrekoe ekintzailetza arduradunak eman diote hasiera ekitaldiari.

Sektoreko hainbat profil bildu dira: ekintzaileak, inbertizaileak eta irakasleak. Asier Aleak publikoarekin partekatu ditu GOe–Gastronomy Open Ecosystem-en gakoak. Zientzia eta gastronomia uztartzen dituen proiektua da, eta “elkarrekin lan eginez, sektorearen etorkizuna elkarrekin sortzeko lekua”.

Itxaso del Palacio, Notion Capital-eko bazkide orokorra; Felipe Peñacoba, Revolut-eko CIO; Mo Khodadadi, Satis AI-eko sortzaile eta CEO; Fred Gifford, Sony AI-eko Strategy & Partnership Manager; Ali Morrow, Clay Capital-eko venture bazkidea; eta Josh Hatfield, Hoxton Farms-eko produktuen garapeneko chef-a; “Local Agents” mahai ingurua partekatu dute. Hauek honako gaiak landu dituzte: ekintzailetzaren ekosisteman elkarrekin lan egiten duten hainbat eragileren beharra eta talentuaren garrantzia.

Sejal Ravji, Cardumen Capitaleko partnerrak, bere hitzaldiaren bidez, nekazaritza sektorean eragina izango duten proposamen berritzaileen beharra azpimarratu du, eta ekosistemako hainbat eragileren arteko aliantza estrategikoetan jarri du arreta.

Ondoren, otsailaren 1an antolatutako Londreseko geldialdi honetan parte hartu duten startupek –Eat It, Icenine, Local Meal, Meal-Lords y Tablecoin– beren proiektuak aurkeztu eta defendatu dituzte Asier Alea, Basque Culinary Centerreko Garapen Globaleko zuzendariak; Raquel Martin, GOe–Gastronomy Open Ecosystem-eko project managerrak; Pierre-Jean Hanard, University College London-eko ekintzailetzako hezkuntzako irakasle elkartua eta liderrak; eta Itxaso del Palacio, Notion Capital-eko bazkide orokorrak osatutako adituen epaimahaiaren aurrean.

Azkenik, Juan Carlos Arboleya, elikagaien fisikokimikoa eta Basque Culinary Centerreko Gastronomia Zientziak Masterreko zuzendaria, eta Eneko Axpe, Basque Culinary Centerreko zientzialari laguntzailea, bat etorri dira “Science meets gastronomy” hitzaldian, non gastronomiari jakintza-adar desberdinetatik heltzearen garrantziarekin eta askotariko eragileen ikuspegia uztartzen duen diziplina anitzeko ikuspegi batetik azaldu duen. Bestalde, Axpek adimen artifizialak gastronomiaren sektorean dituen aplikazio batzuk partekatu ditu.

Hurrengo lehiaketa 2024ko otsailaren 22an Buenos Airesen izango da. Tokiko ekitaldi bakoitzeko startup irabazleen saria hau izango da: Donostiako LABe-Digital Gastronomy Lab startup-inkubagailuan hilabeteko egonaldi bat, Basque Culinary Centerrek kudeatutako berrikuntzako living lab ireki bat eta BCC Innovation, Basque Culinary Centerren gastronomiako zentro teknologikoan 20 orduz ikerketa- eta berrikuntza-proiektuak egiteko aukera. Horrez gainera, startupek aukera izango dute denbora-tarte horretan GOe Community plataforma digitalean plan aurreratu bat egiteko, non Basque Culinary Centerreko aditu eta mentoreen sarearekin bat egiteko eta hartan sartzeko modua izango baitute, eta hainbat motatako laguntza jasoko baitute zenbait gairen inguruan (zentroko inbertitzaileen sarerako sarbidea, networka, tokiko ekosisteman sartzeko laguntza, etab.).

Azkenik, tokiko bost startup finalistek final handian lehiatuko dira —2024aren apirilean egingo da, Donostian—. Herrialde bakoitzeko startup irabazleak arituko dira lehian, eta hirugarren Culinary Action! On The Road lehiaketako startup irabazlea hautatuko da. Startup horrek LABe-Digital Gastronomy Lab-en urtebeteko egonaldi bat eta BCC Innovation zentro teknologikoan 25 orduz ikerketa- eta berrikuntza-proiektuak egiteko txartela irabaziko ditu.

Londres-eko startup partehartzaileak

Eat It sari-sistema aplikazio bat da, zure elikagaien ingurumen-inpaktuaren jarraipen erraza egiteko eta hauteskunde ekologikoengatiko sariak lortzeko, planetaz arduratzen diren negozio txiki jasangarrietan deskontuak eginez.

Icenine Londresen egoitza duen edari esperimentalen enpresa da. Izotzezko esferak sortzen dituzte, mokadu tamainakoak, alkoholez betetako marakuyazko oskolekin. Oskola 9 segundu ondoren hausten da alkohola askatuz eta izotza atzean utziz ahosabaia garbitzeko.

LocalMeal-en xedea da jatetxeen gomendioetan konfiantza berreraikitzea, toki txiki, lokal eta gozagarrietarako gomendio pertsonalizatuak eskainiz.

Meal-Lords-ek jatetxeei beren menuetan informazio bitaminikoa eta nutrizionala erakusten lagundu egiten die, adimen artifizialeko tresnak eta ematen duten informazioa erabiliz.

WNWN Food Labs-ek munduko elikagai gogokoenak jasangarriagoak eta etorkizunera begira egiten ditu. Kakaorik gabeko alternatiba batekin hasi da, ohiko txokolatea bezela dastatzen, urtzen eta izozten den aukera diseinatu dute. 

Tablecoin startupak HORECA sektorera zuzendutako kriptomonetaren mundua du ardatz.

Cardumen Capitalek bere hirugarren inbertsio-funtsaren lehen itxiera iragarri du, Cardumen Fund III: AgriFoodTech. Horrekin Europako eta Israelgo konpainietan inbertitzen hasiko da AgriFood sektorean. Venture Capital enpresako kudeatzaileak 30 inbertsio baino gehiago egin ditu orain arte goi-teknologiako enpresetan.

Cardumen Fund III: AgriFood Tech 9. SFDRren 9. artikuluan sailkatzen den inbertsio-funtsa da (inbertsio jasangarrirako helburua duena), Basque Culinary Centerrekin lankidetzan sortua, A serieko nekazaritzako elikagaien goi-teknologiako konpainietan inbertitzeko. Zehazki, inbertsio-funtsak enpresetan inbertituko du AgriTech eta Food Tech bertikaletan, zenbait proteinaren, doitasunezko nekazaritzaren eta bioestimulatzaileen artean. Inbertsio-funtsak Eusko Jaurlaritzaren, Gipuzkoako Foru Aldundiaren, Family offices, Basque Culinary Center, AgriTech eta Food Tech sektoreetako korporazioen, inbertitzaile instituzionalen eta beste inbertitzaile estrategiko batzuen konpromisoak jaso ditu.

Inbertsio-funts honekin, Cardumen Capital-ek bere inbertsio-eremua Europa osora zabalduko du. “Ekintzaileen bila gabiltza, elikadura-sektoreko balio-kate osoan arazo handiak konpontzeko teknologia erabiltzen dutenak” esan du Sejal Ravji doktoreak. Ravji doktoreak bi hamarkadako esperientzia du elikaduraren sektorean, eta produktuen berrikuntza eta garapenaren arduraduna da Pascual Innoventures, Nestlé, GBFoods eta Northern Foods konpainietan. 

Igor de la Sota Cardumen Capital-eko bazkide sortzaileak hau adierazi du: “industria eraldatzeko ahalmena duten negozio handietan inbertitzeko aukera handia ikusten dugu.”

“Energia-sorkuntza berriztagarrian eta mugikortasun elektrikoan iraultza egin ondoren, hirugarren inbertsio-olatua elikagaien sektorean izango da, mundu osoan berotegi-efektuko gas gehien sortzen dituen hirugarren industria baita”, dio Gonzalo Martínez de Azagrak, Cardumen Capital-eko bazkide sortzaileak.

“Urte asko daramatzagu gure azelerazio-programetan aukera handiak ikusten, eta gustura gaude gastronomiaren eta ekintzailetzaren arloetan dugun lidergoa osatzeko”, adierazi du Asier Aleak, Basque Culinary Centerreko Garapen Globaleko zuzendariak.

Basque Culinary Centerren Nazioarteko Kontseilua, munduko chefik ezagunenetako batzuek osatua, berriz bilduko da Perun ekainaren 16tik 19ra, eta gastronomiaren irismena izango du hizpide, goraipatzeko, sakontzeko eta eztabaidatzeko. T´impuy goiburua erabiliko da.     

Topaketa berezi horretan eztabaida zabala egingo da kozinatzen nahiz jaten dugunari buruz, bai eta horren inguruan biraka dabilen guztiaren gaineko inpaktuari buruz. Gastón Acurio eta Pía León anfitrioiekin batera, Nazioarteko Kontseiluak azpimarratuko du azken hamarkadetan Peruk gastronomiaren hedapenean bete duen zeregina —talentuen, tradizioen eta ideia eraldatzaileen sehaska gisa—.

2024, PERURA ITZULTZEA

Peruren zeregina berezia izan da nazioarteko gastronomiak azken hamarkadetan izan duen hedapenean; izan ere, lehen mailako talentuen sorlekua izan da, eta bertan, borborka aritu dira Basque Culinary Centerren 2011ko Nazioarteko Kontseiluaren lehenengo bileran islatutako kezkak eta proposamenak. Bilera hartan, “Etorkizuneko sukaldarientzako gutuna” idatzi zen, zeina Basque Culinary Centerren Nazioarteko Kontseiluaren sortzaileek —besteak beste, orduko sukaldari onenetako batzuek osatua: Gastón Acurio, Massimo Bottura, René Redzepi, Alex Atala, Ferran Adrià eta Dan Barber— sinatu baitzuten eta mundu osoan zabaldu baitzen. Ordutik, lorpen ugari egin dira eta asko ikasi da.

Belaunaldi berriek dakartzaten kezkekin lotuta, eta ulertuta sektore gastronomikoak sortzen duen aberastasuna egunetik egunera handiagoa dela, erronkak desberdinak direla, garai berriak abiadura bizian garatzen direla eta beharrak eta hartzaileak eboluzionatzen ari direla, Basque Culinary Centerren egungo Nazioarteko Kontseilua osatzen duten maila handiko zenbait kide —besteak beste, Joan Roca (Espainia), Dominique Crenn (Frantzia/AEB), Mauro Colagreco (Argentina/Frantzia), Yoshihiro Narisawa (Japonia), Manu Buffara (Brasil), Josh Niland (Australia), Thitid Tassanakajohn (Tailandia) eta Elena Reygadas (Mexiko)—  Peruko Unibertsitate Katoliko Pontifikalaren auditorioan (PUCP) izango dira ekainaren 19an. Ekitaldiaren izena T´impuy da, eta irakite, egoste edo eferbeszentzia kontzeptuari egiten dio erreferentzia. Izan ere, sukaldari haiek 2011n egin zituzten hausnarketak birpentsatzeko gune izango da. Hala, sektorearen etorkizunari aurre egiteko, gastronomiaren nonahikotasuna azpimarratuko da, eta egungo eskaerekiko lotura egingo da, hitzaldi, solasaldi eta mahai-inguruen bidez.

Basque Culinary Center buru duen goi mailako topaketaren anfitrioiak Gastón Acurio (Astrid & Gastón) eta Pia León (Kjolle) izango dira. Peruko gastronomia indartsuaren bi ordezkari horiek herrialdeko biodibertsitate handia erakusten dute sukaldaritzaren bidez, eta Basque Culinary Centerren Nazioarteko Kontseiluko kide dira.

Gainera, abiapuntutzat miresmena eta gastronomia garatzen lagunduko duten elkartrukeak sustatzeko gogoa hartuta, Lima eta Cusco hiriak bisitatuko ditu Basque Culinary Centerren Nazioarteko Kontseiluak, ezagutza ongarritzeko, eztabaidak ereiteko eta etorkizuneko apustu partekatuen uzta biltzeko. Topaketa honek zenbait jarduera garatuko ditu hiru egunetan zehar: kontseilua bilduko da, Basque Culinary World Prize 2024ren irabazlea aukeratuko da eta “Etorkizuneko sukaldarientzako gutuna” eguneratuko da. Hitzordua ekainaren 19an amaituko da, Liman egingo den hausnarketa-jardunaldiarekin.

XIV. GASTRONOMIA-TOPAKETA

2024an, Basque Culinary Centerrek Nazioarteko Kontseiluaren hamalaugarren urteko bilera egingo du testuinguru aparteko batean. Hala, jarraipena emango zaie aurretik hamahiru urtetan New Yorken, Liman, Mexiko Hirian, Modenan, San Frantziskon, Gironan, Tokion eta erreferentziazko beste jomuga gastronomiko batzuetan eginiko bilerei eta ekitaldiei; jardunaldi horietan, jasangarritasuna, biodibertsitatea, talentua eta gastronomia-sektorearen eraldaketa izan dira hizpide, diziplinarteko ikuspegi batetik.

Pia Leóni buruz

Pia Leónek sendotua du egungo Peruko gastronomiaren ikuspegirik pertsonal eta sortzaileenetako bat. Haren proposamenak aukera ematen du haren herriaren aniztasun eta aberastasun kultural zabala ezagutzeko. Lehenengo urratsak Central jatetxearen jabekide gisa egin zituen. Jatetxe hori mundu osoko hoberena izan zen 'The World's 50 Best Restaurants' zerrendaren 2023ko edizioan, eta Latinoamerikako 50 jatetxerik onenen zerrendako lehena izan zen hiru urtetan jarraian. Centralen ostean, bide propioari ekin zion Kjolle jatetxearekin. Latinoamerikako emakumezko chef onenaren saria irabazi zuen 2021ean, bai eta errebelazio-chefaren saria ere 2019an. Kjolle, Peruko kultura eta edertasuna goraipatzeko eta zaintzeko Piak duen asmoa finkatuz, 2019ko Latinoamerikako 50 jatetxerik onenen zerrendan 21.a izan zen, eta sarrerarik onenaren saria irabazi zuen.

Gastón Acuriori buruz

Peruko sukaldaritzaren ikono bat da, eta ekintzaile arrakastatsua. Formatu ugaritako apustu gastronomikoak dauzka mundu osoan zabalduta. Astrid & Gastón jatetxe entzutetsuaren jabea da Acurio. Sutsuki sinesten du sukaldaritzak gizarte-aldaketarako tresna gisa duen ahalmenean. Bere herria munduan zehar ezagutarazteko egin dituen ahaleginak direla eta, oso ezaguna da, eta mugarik gabeko interesa piztu du cebicheaz besteko hango sukaldaritzan. Pachacútec proiektuaren sustatzailea da. Haren bidez, sukaldaritzan prestatzen ditu dozenaka gazte. Gainera, kausa kulturalak, sozialak, ingurumenekoak eta abar bultzatzen ditu. Halaber, liburu ugari idatzi ditu, hala nola Perú: Gastronomía —sukaldaritza peruarrari buruzko liburua, etxeko sukaldaritzako 500 errezeta tradizional biltzen dituena—, Cebiche Power eta Recontra ¡Bravazo!. Gainera, Gastón izan zen Basque Culinary Centerren Nazioarteko Kontseiluaren sortzaileetako bat eta haren lehenengo bileraren anfitrioia, Liman 2011n, non aipatutako “Etorkizuneko sukaldarientzako gutuna” ekimenean parte hartu baitzuen. 

BASQUE CULINARY CENTERREN NAZIOARTEKO KONTSEILUA

Basque Culinary Centerren Nazioarteko Kontseilua funtsezko erakunde bat da. Haren ardura da Basque Culinary Centerren lan estrategikoetarako aholkuak ematea eta gastronomian aurrera egiten lagunduko duten ahaleginak orientatzea, aukerak identifikatzen laguntzea eta eztabaida- eta ekintza-esparruak irekitzea. Gaur egungo sukaldari garrantzitsuenetako batzuek osatzen dute.

Honako hauek izan ziren fundatzaileak: Ferrán Adrià (Espainia), Joan Roca (Espainia), Gastón Acurio (Peru), Massimo Bottura (Italia), Michel Bras (Frantzia), René Redzepi (Danimarka), Heston Blumenthal (Erresuma Batua), Alex Atala (Brasil), Dan Barber (AEB) eta Yukio Hattori (Japonia). Denboran zehar, honako hauek gehitu zaizkie: Enrique Olvera (Mexiko), Mauro Colagreco (Argentina/Frantzia), Manu Buffara (Brasil), Yoshihiro Narisawa (Japonia), Trine Hahnemann (Danimarka),  Dominique Creen (Frantzia/AEB), Pia León (Peru), Josh Niland (Australia), Narda Lepes (Argentina), Elena Reigadas (Mexiko) eta Ton Ttassanakajohn (Thailandia).

EDA Drinks & Wine Campusa egiteko diseinu arkitektonikoko lehiaketa publikatu du Basque Culinary Centerrek, Gasteizko eta Guardiako eraikinak egiteko soluzioak ematen dituzten proposamen onenak hautatzeko, betiere jasangarritasunaren, funtzionaltasunaren, teknologiaren, ingurumenaren eta estetikaren ikuspegietatik.

Nazioarteko arkitektura-lehiaketa ireki bat da, eta haren helburua da proposamen arkitektoniko bakar bat hautatzea, bi egoitzak ikuspegi eta kontzeptu berean barne hartuko dituena, proiektuaren ikuspuntuarekin bat etorriko dena eta lurraldean erreferente izango diren espazioak ekarriko dituena.

Arkitektura-proiektuek talentua, ekintzailetza, ikerketa eta berrikuntza erakarriko dituzten espazio ireki eta bereziak sortu beharko dituzte. Jasangarritasuna izango da bi eraikinek bete beharreko balio eta irizpide nagusietako bat. Gainera, hiri- eta landa-paisaian modu organikoan eta, batez ere, zuzeneko ingurunean parte hartuz integratu beharko dute.

Lehiaketaren xedea da, halaber, EDAk Araba eta Euskadi edarien alorrean eskualde gailen gisa posizionatzeko duen ikuspegia gauzatuko duten diseinu arkitektoniko bikainak hautatzea.

EDA Drinks & Wine Campusen egoitzak, ikerketa aurreraturako toki izateaz gainera, berrikuntzaren eta jasangarritasunaren ikono ere izango dira. Guardiako egoitza Ardoaren Etxetik gertu dagoen gune batean kokatuko da, 4.000 m2-ko lursail batean. Eraikin berriak 2.500 m2 izango ditu. EDAren Gasteizko egoitzak 8.610 m2 izango ditu, eta Lakua auzoan egongo da, autobus-geltokiaren ondoan (Eusko Jarlaritza parean).

Mundu guztiko arkitektura-estudioek eta diseinu-ekipoek har dezakete parte lehiaketan. Bikaintasun akademikoa, berrikuntza eta jasangarritasunarekiko konpromisoa bateratuko dituen abangoardiako espazio bat sortzen laguntzeko aukera paregabea izango da erronka handi honetan parte hartzea.

FASEAK

Lehiaketa urtarrilaren 3an irekiko da ofizialki, Euskadiko kontratatzailearen profilean eta Europar Batasunaren Aldizkari Ofizialean argitaratzearekin batera. Prozesuaren amaierarako, EDAren nortasun arkitektonikoari forma emango dioten 3 estudio finalista hautatuko dira. Lehenengo fasean, merituak ebaluatuko dira; arkitektura-estudioek hilabete inguruko epea izango dute beren erreferentziak aurkezteko.

Lehiaketako epaimahaia epe hori itxi eta hurrengo bi egunetan eratuko da, eta kide hauek osatuko dute: Basque Culinary Center ordezkaritzapeko presidente bat, EDAren izenean, idazkari nagusi bat, bi arkitekto independente eta erakunde parte-hartzaile bakoitzeko ordezkari tekniko bat (Eusko Jaurlaritza, Arabako Foru Aldundia, Guardiako Udala eta Gasteizko Udala). 
 

Prozesu horretan, lehiaketako oinarrietan definitutako irizpideen arabera, epaimahaiak hautagai finalisten lehen aukeraketa bat egingo du. Horretarako, kontuan izango ditu curriculumen ebaluazioa, batetik, eta esperimentaziorako, ikerketarako, garapen teknologikorako eta irakaskuntzarako espazioak dituzten eta jasangarritasuna eta paisajismoa funtsezko balio dituzten berrikuntzaren garapenera bideratutako eraikin berrien eraikuntza-proiektuei buruzko erreferentzia ziurtatuak, bestetik. Halaber, kontuan izango dira bestelako faktore batzuk, hala nola inguruneetara moldatzeko modua, estudioaren laneko filosofia eta gastronomiaren eta edarien sektoreari lotutako eraikinen diseinuan duten esperientzia.

Epaimahaiak hilabeteko epean emango du hiru estudio finalisten berri, hura eratzen denetik zenbatzen hasita. Instantzia horretan, bi egoitzak diseinatzeko eta beharren programa eta betekizun urbanistikoak jasoko dituzte, eta gutxienez bisita tekniko bat egin beharko dute kokapenetara, proposamenak prestatu aurretik.

Esleipen-prozesuaren bigarren fase horretan, besteak beste, irizpide hauek hartuko dira kontuan diseinuak hautatzeko garaian: soluzio arkitektonikoa, premien programarentzako erantzuna, esku-hartze urbanistikoa, ingurunean integratzeko modua, kostuen azterketa, kronogramarekiko egokitzea, eraginkortasun energetikoa eta diseinuaren berezitasuna. Gainera, Basque Culinary Centerren ekosistema guztiarekiko koherentzia ere izan beharko dute.

Hiru estudio finalistek bi hilabete izango dituzte beren proposamena aurkezteko. Izengoitia erabili beharko dute, hautaketa-prozesuan inpartzialtasuna bermatzeko eta egilearen trazabilitatea saihesteko.

Aurkeztutako proposamenak aztertuko ditu epaimahaiak, eta lehenago adierazitako irizpideen arabera (argitaratutako oinarrietan ikus daitezke) puntuatuko ditu. Proposamen irabazle bat eta bi finalista hautatuko ditu; bi finalistek accesita lortuko dute.

2024ko martxoan iragarriko da estudio eta proposamen irabazlea: une garrantzitsua izango da EDA Drinks & Wine Campusen garapenean.

Lehiaketari buruzko xehetasun gehigarriak, eskakizunak, baldintza-orriak eta data garrantzitsuak herritarren eskura daude Kontratazio Publikoa Euskadin plataforman.

Alcheme Bio (Estatu Batuak), zeinak zeinak lehengaien industria goitik behera aldatzen duen zaporea eta nutrizioa optimizatzeko prozesua arrazionalizatuz, I+Gko denbora eta kostuak murriztuz eta kontsumitzaileek maite dituzten produktuak sortzeko aukera emanez, irabazi du foodtech-startupentzako Culinary Action! On The Road nazioarteko ekintzailetza-programaren hirugarren edizioko New Yorken ospatu den geldialdia, Green Circle Capital eta Cornell University kideekin antolatua. 

Stu Strumwasser, Green Circle Capital-eko fundatzaile eta zuzendariak; Jenn B. Smith, Cornell Unibertsitateko Ekintzailetza Fakultateko zuzendariak eta Ander López,  Basque Culinary Centerreko Ekintzailetza Arduradunak eman diote hasiera ekitaldiari.

Sektoreko hainbat profil bildu dira: ekintzaileak, inbertizaileak eta irakasleak. Bruno Xavier, Cornell Food Venture Centerreko zuzendariordeak ireki du jardunaldia zentroan egiten duten lanari buruz hitz egiten; elikagai-sektoreko enpresei (handiak eta txikiak) produktu berriak merkaturatzen laguntzen. Jarraian “Ecosystem agents” mahai ingurua izan da hurrengo hizlariekin: Peter Boldenheimer, Unstuck-eko bazkide eta fundatzailea; Rachel Atcheson, New Yorkeko alkatearen Elikadura Politikako Bulegoko zuzendariordea; Caroline Mak, Big Idea Ventures-eko programen zuzendaria eta Kristen Barnett, Hungry House-eko fundatzaile eta CEO.

Alex Papadopoulos, Velada startup-eko ko-fundatzaile eta CEO-ak – 2020an Culinary Action!-en Global Foodtech Accelerator programako startup parte-hartzailea izan zen– “The future of restaurant discovery” tituluarekin, Culinary Action-en azeleragailuan izandako esperientzia eta Velada gastronomikoak egiten duen lana azaldu du: aplikazio gisako gida gastronomikoa, une bakoitzeko jatetxerik onenak biltzen dituena kritiko gastronomikoekin lankidetzan.

Ondoren, abenduaren 6an antolatutako New Yorkeko geldialdi honetan parte hartu duten startupek: Ansa, Unibaio, Atlantic Fish Co., eta Alcheme Bio; beren proiektuak aurkeztu eta defendatu dituzte adituen epaimahai baten aurrean.

Azkenik, Joo Youl Lee, Basque Culinary Centerreko Zientzia Gastronomikoen Masterreko irakasleak, “What is gastronomic sciences?” izenburuko hitzaldian, Basque Culinary Center-en lan-metodologia eta gastronomia-zientziei buruzko ikuspegia zein den azaldu du masterrean bertan aplikatzen diren adibideen eta kasuen bidez.

Hurrengo lehiaketak 2024ko otsailaren 1ean Londresen eta hilabetearen amaieran Buenos Aires-en izango dira. Tokiko ekitaldi bakoitzeko startup irabazleen saria hau izango da: Donostiako LABe-Digital Gastronomy Lab startup-inkubagailuan hilabeteko egonaldi bat, Basque Culinary Centerrek kudeatutako berrikuntzako living lab ireki bat eta BCC Innovation, Basque Culinary Centerren gastronomiako zentro teknologikoan 20 orduz ikerketa- eta berrikuntza-proiektuak egiteko aukera. Horrez gainera, startupek aukera izango dute denbora-tarte horretan GOe Community plataforma digitalean plan aurreratu bat egiteko, non Basque Culinary Centerreko aditu eta mentoreen sarearekin bat egiteko eta hartan sartzeko modua izango baitute, eta hainbat motatako laguntza jasoko baitute zenbait gairen inguruan (zentroko inbertitzaileen sarerako sarbidea, networka, tokiko ekosisteman sartzeko laguntza, etab.).

Azkenik, tokiko bost startup finalistek final handian lehiatuko dira —2024aren apirilean egingo da, Donostian—. Herrialde bakoitzeko startup irabazleak arituko dira lehian, eta hirugarren Culinary Action! On The Road lehiaketako startup irabazlea hautatuko da. Startup horrek LABe-Digital Gastronomy Lab-en urtebeteko egonaldi bat eta BCC Innovation zentro teknologikoan 25 orduz ikerketa- eta berrikuntza-proiektuak egiteko txartela irabaziko ditu.

New York-eko startup partehartzaileak

Ansa-k garatutako metodoarekin, kafearen zaleei aleak eta kafea etxean txigortzeko aukera ematen die; hondakinak, bilgarri ez-iraunkorrak eta aleak berotzearen ondoriozko kutsadura saihestuz.

Unibaio-n osagai biodegradagarri bat garatu dute, agrokimikoen entrega optimizatzeko, aplikazio-dosia eta toxikotasun-maila murrizteko helburuarekin.

Bestetik, Atlantic Fish Cok itsaski alternatiboak ekoizten ditu, munduari proteina gozo eta jasangarria emateko.

Azkenik, Alcheme Bio-k elikagaien konposizioaren eta zaporearen arteko lotura lantzen dute, eta lehengaien formulazioa aldatzeko aukera ematen dute. 

Ander Ausin eta Ainara Etxeberriaren Labar proposamen gastronomikoa izan da Euskadiko Jatetxe Gastronomikoen Inkubagailuan gehien aurreratu duen ideia, zeinak “atzokoa, gaurkoa” lelopean, plater ezagunen errezeta-bilduma klasikoa eskainiko duen, Debako kasinoan zaharberritutako eraikin historikoan gune gastronomiko berri batean partekatu eta gozatzeko helburuarekin.

Inkubazio-prozesuko ideia berritzaileena, aldiz, Lucía Rave eta Aarón Castilloren Lua Bistro proiektua izan da hautatua. Hauek jatetxe baten bidez lehengaiak eta baliabideak aprobetxatzean oinarritzen den proposamen gastronomikoa proposatzen dute.

Ander López, Basque Culinary Centerreko ekintzailetza arduradunak, “jatetxe bat sortzeko prozesuan funtsezko zeregina duten eremu guztiak betetzen saiatu gara inkubagailuan antolatutako saioekin” azpimarratu du.

2022an, Euskadiko Jatetxe Gastronomikoen Inkubagailuaren lehen edizioan, Carlos Jordán Lasheras-en Soto del Prior proposamen gastronomikoa izan zen Inkubagailuan gehien aurreratu zuen ideia bezala hautatua. Inkubazio-prozesuko ideia berritzaileena, aldiz, Andoni, Julen eta Xabi Pérez Cuadrado anaien Kiska proiektua izan zen izendatua. Donostiako finalean ere izan ziren My Private Chef, José Ignacio Apostegui de la Torre-rena; Ignacio Aguirre-ren, Vardul Gastrobeer-a; Pablo Odriozolaren Muy Top proposamena;  Bihurri (Cocina miniatura), Itoiz Urretaren ideia, eta David Estévez eta David Martín-en Kalejira Gastroteka.  

Azaroaren 29an ospatutako “Demo Day”-a, Donostian, LABe–Digital Gastronomy Lab-en gertatu da; eta proposamen gastronomikoak adituen batzorde baten aurrean aurkeztu eta defendatu dituzte Inkubagailuko parte-hartzaileek. Carlos Jordan-ek, Soto del Prior proiektuko jabeak, eta 2022ko lehen edizioko Jatetxeen Inkubagailuan gehien aurreratutako ideiak, bere ibilbidea eta esperientzia partekatu du gerturatutakoekin: “Culinary Action! zuen negozioa garatzeko izango duzuen aukerarik onena da. Hau prestakuntza bat baino gehiago da, ekosistema bat da, eta denetik elikatu behar da”.

Labar eta Lua Bistro proiektuak hurrengo epaimahaiak hautatu ditu irabazle: Ander López Delgado, Basque Culinary Centerreko ekintzailetza arduradunak; Aitzol Zugasti, AZ Gastronomia; Mentzia Otxoa de Zuazola, Hazi Fundazioko ekintzaileta eta berrikuntza zuzendaria; Ramón Gómez, Onnera Group-eko zuzendari korporatiboa eta Asier Mijangos, Mahou San Miguel-eko iparraldeko merkatu-kudeatzailea.

Gainera, prozesuan Culinary Action! ekimenaren laguntza eta expertise ekintzailea izango dute, Basque Culinary Centerren ekosistema guztiarenarekin batera. Ekimenaren partner-ak, Gipuzkoako Ostalaritzako Enpresaburuen Elkarteak eta AgroBankek babestuko dituzte, zenbait zerbitzu eman eta kolaborazio egingo baitituzte. Aipatzekoa da La Salvek aholkularitza eta ekipamendurako eman duen laguntza. Mentoria pertsonalizatuetan 1.500€ eman ditu, eta Aravenek bere aldetik, 2.000€-rainoko ekarpen ekonomikoa duen mentoriak antolatu ditu. Era berean, Fagor Professional-ek 2.500€-ko ekarpen ekonomikoa eman die bi proiektu irabazleei eta aholkularitzak eskaini ditu bere proiektuak diseinatu eta garatzeko. Azkenik, tSpoonLab-ek hilabeteko proba eskainiko du, parte-hartzaile bakoitzarentzat jatetxeak kudeatzeko softwarearen lizentziaren gainean.

Aurrez, 9 astez, parte-hartzaileek astero mentore-lanak jaso dituzte sukaldaritzaren sektoreko adituekin eta beste marketina eta salmentak, finantzak edo kudeaketa arlotako adituekin; horien artean, Aitor Elizegi (Bascook), Eduardo Serrano (ESMA), Romina Afonso (PerretxiCo), Mariasun Ibarrondo (Restaurante Boroa), Enrique Fleischmann (Fleischmann’s cooking group), Gonzalo Parras (Basque Culinary Center), Paulo Airaudo (Restaurante Amelia), Aitor Arregi (Restaurante Elkano), Manuel Rodríguez (Araven), Ibon Leunda (Asociación de Hostelería de Gipuzkoa), Felipe Ruiz (TspoonLab), Naiara López (Elkargi) eta Asier Mijangos (Mahou) eta Julio Cerezo (SABEER).

Culinary Action! ekimenak talentu ekintzailea indartu eta gaitu nahi du, lurraldearen izaera berritzailea indartzeko proposamen berriak garatuz. Jatetxe Gastronomikoen inkubagailuen lehen edizioak Eusko Jaurlaritzako Ekonomiaren Garapen, Jasangarritasun eta Ingurumen Sailaren eta Gipuzkoako Ostalaritza Elkartearen babesa du, eta La Salve eta Aravenen laguntza ere bai. Culinary Action! Basque Culinary Center eta Haziren ekimen gastronomikoko programa bat da, The Food Global Ecosystem-en barruan kokatua. Culinary Action! GOe (Gastronomy Open Ecosystem) programan egingo diren jarduera-ildoen eta ekimenen parte da.

Parte-hartzaileak

Ideia eta proiektu hauek hartu dute parte: El Point, Edgard Bastidarena, kalitate handiko janari lasterra eskaintzen du Bilbon, bezeroaren gogobetetasunari eta eskura dauden aukeren aniztasunari begira. Ander Ausin eta Ainara Etxeberria, biak Basque Culinary Centerreko Jatetxeak Berritu eta Kudeatzeko Masterreko alumniak, Labar sortu dute Deban, jatorri klasikoko jatetxea, baina garaikidea janaria eta zerbitzua egiteko orduan. Bien bitartean, Anastasia Orlovaren Talo Ega Crepe proiektua "panke" bat sortzea da asmoa, pintxoen antzekoa baina zerbitzu desberdina duena.

Azala proiektua, Jon Gil chefarena, gure arbasoen antzinako kultura eta gastronomia balioetsi nahi ditu XIX. mendeko baserri batean, errotze eta ñabardura tradizionalekin dekorazioan eta abangoardiako sukaldaritzan, Arabako eta Aialako produktu tradizionalekin. Azkenik, Lucia Rave Guerrerok eta Aarón Castillo Telleriak, Lua Bistro proiektuarekin, lehengaien eta baliabideen aprobetxamenduan oinarritutako proposamen gastronomikoa sortu dute. Jatetxe eta azoka bat planteatzen dute, eta bertan bazkari, aperitibo eta afarien karta bat eskainiko dute, denboraldiko produktuetatik abiatuta diseinatuko dutena.

EDA Drinks & Wine Campus aurrera doa bere ibilbide‑orrian. Zehazki, EDA Drinks & Wine Campus proiektua mahastizaintzako eta ardogintzako sektoreko ordezkari eta eragile talde bati aurkeztu zaio gaur Guardian. Horiek, dinamika parte‑hartzaile baten bidez, sektorearen beharrak eta iradokizunak adierazi dituzte edukien definizio zehatza taxutzeko.

Topaketaren une garrantzitsuenetako bat Guardiak Arabako Errioxako EDAren egoitza hartuko duela iragartzea izan da. Egoitza horrek proiektua indartuko du Vitoria‑Gasteizko egoitzarekin batera, sinergiak batuko dituzte ardoaren eta edarien balio‑katearen alde, unibertsitate‑prestakuntzaren, ikerketaren, berrikuntzaren eta ekintzailetzarako laguntzaren bidez.

Guardiako egoitza eraikiko den partzela herri horretako “Ardoaren Etxetik” hurbil dago, eta ingurune egokia izango da arlo horretan. Partzelak 3.900 m2‑ko azalera du, eta 2.500 m2‑ko eraikin berri bat eraikiko da bertan. Bertan, unibertsitate‑prestakuntzara, ikerketara eta ekintzailetzari laguntzera bideratutako espazioak egongo dira.

Arabako Errioxako egoitzak ardoaren unibertsoa izango du ardatz, eta haren helburua da talentua erakartzea, balio handiko prestakuntza espezializatua eskaintzea, eta ezagutza sektorera transferitzea xede nagusi izango duten ikerketa‑ildoak garatzea.

Prestakuntza aurreratua eta ezagutza oinarrizko elementuak dira ardoaren sektorearen bilakaerarako. Sektorea talentuaren bilakaeraren ikuspegitik hazteko beharrari erantzuten diote, ardoaren eta beste edari batzuen ekoizpenaren konplexutasuna eta sofistikazioa kontuan hartuta. EDAren konpromisoa da mahastizaintzako eta ardogintzako industrian berrikuntza, ekintzailetza eta jasangarritasuna bultzatze, teknika efizienteak garatzea eta sektore horren erronketara egokitzen diren praktika jasangarriagoak aplikatzea.

Gero eta globalizatuagoa den mundu honetan, EDAk tokiko tradizioak nazioarteko joerekin lotuko dituzten zubiak eraikitzen lagunduko du, eta, hala, Euskadiren eta Arabako Errioxaren lurralde‑posizionamendua indartu.

Testuinguru horretan, EDAk Araba munduko ardoaren eskualde handien mailan kokatu nahi du, hala nola Bordele, Napa edo Adelaida, baita leku horietan dauden goi‑mailako unibertsitate eta zentro espezializatuei dagokienez ere. EDAk aurreikusten du bere lehenengo ikasleak 2026ko irailean jasoko dituela, baina jarduera 2024an hasiko da, ikastaro espezializatuen, tailerren eta berariazko prestakuntzaren bidez. Horiek behar bezala iragarriko dira.

EDA Drinks & Wine Campusek edarien sektorea eraldatzen lagunduko du. Hala, nazioarteko berrikuntzaren erreferente bihurtuko da; enpresei eta erakundeei negozioak, produktuak eta zerbitzuak kalitate-, jasangarritasun- eta osasun-printzipioen arabera eta ikuspegi lokal eta globalarekin diseinatzean osagai bereizgarri bat emango die; eta garapen ekonomiko eta soziala sortuko du.

EDAren bi egoitzak diseinatzeko, arkitektura‑lehiaketa bat deituko da, proiektu arkitektonikoaz arduratuko den arkitektura‑estudioa hautatzeko.

EDA Basque Culinary Centerrek garatu eta gidatutako proiektua da, Eusko Jaurlaritzak eta Arabako Foru Aldundiak sustatua. Basque Culinary Centerrek nazioarteko erreferentziazko ekosistema aitzindari bat osatzen du, non prestakuntza, berrikuntza, ikerketa eta ekintzailetza aldi berean dauden gastronomia garatzeko eta bultzatzeko helburuarekin, gastronomia hori jaten dugunari eta jateko moduari buruzko ezagutza arrazoitutzat hartuta. 

Bere eginkizuna hainbat faktoretan oinarritzen da, besteak beste: pasioa, berrikuntza, bikaintasunera bideratzea eta konpromiso soziala. Basque Culinary Center 2011tik dago Donostian eta erakunde aitzindaria da, Gastronomia Zientzien Fakultateak eta BCC Innovation Gastronomiako Zentro Teknologikoak osatzen dutena.

 “Edariak” unibertsoa aukeraz beteriko mundua da, eta, beraz, oso presente egon da BCCren prestakuntzan, bai unibertsitate‑graduan, maila guztietako irakasgaien bidez, bai sommeliergintzako, enomarketingeko edo koktelgintzako ezagutzak ikasleei transferitzen dizkieten era askotako jarduera eta ekimenetan, besteak beste master eta ikastaroetan. 2013az geroztik, Basque Culinary Centerrek Sommelierrean eta Enomarketingean Masterra du, eta koktelgintzan, bartenderrean edo ardoaren turismoan espezializatzeko hainbat ikastaro ditu. Horien gutzien diseinuaren xedea da, batetik, edarien sektoreko 360º‑etan trebatzea eta, bestetik, enologia eta dastaketaren, sommeliergintzaren, uztarketen, koktelgintzaren, garagardogintzaren eta konbutxen arloko hizkuntza teknikoa eta ardoaren eta beste edari batzuen marketinarekin, sustapenarekin, banaketarekin eta esportazioarekin lotutako guztia ikasteko.

BCC Innovation, Basque Culinary Centerreko gastronomiako zentro teknologikoak, antolatu du XII. Jasangarritasun Jardunaldia Gipuzkoako Foru Aldundiaren laguntzarekin  “Gastronomia jasangarrirantz: berrikuntza eta kolaborazioa ekinean” izenburupean. Topaketa honen helburua izan da gizarte gisa landu behar ditugun erronkak mahai gainean jartzea, klima-aldaketa edo elikagaien xahutzea, ezagutza berria sortzea, eragileen arteko lankidetza edo elkarrizketarako gune berrien sorkuntzaren bidez.

José Ignacio Asensio, Gipuzkoako Foru Aldundiko Jasangarritasuneko Diputatua eta Begoña Rodríguez, BCC Innovation-eko zuzendariak, eman diote hasiera jardunaldiari.

Sektoreko hainbat profil bildu dira: ikertzaileak, nekazariak, chefak, ekintzaileak eta proiektuak. Carmen Urbano (Cocina Lab), Inma Batalla (BC3 Basque Center for Climate Change), Fernando Martínez Peña (Cita Aragón), Berta Vidal (Espigoladors), Jose Peláez (LABe–Digital Gastronomy Lab), Fermín Serrano Sanz (Fundación IBERCIVIS), Bella Bowring (Gerald’s Bar), Jose Manuel Iglesias y Lucía Calvo (La Despensa de Lujo), Denis Ugalde (Somos Oreka), Sandra Isabel Novo (Sostenibles Network), Cinta Lomba (BCC Innovation), Noemi de la Fuente (BCC Innovation) eta Elena Pitak (Fundación Biodiversidad) hartu dute parte ekitaldian.

Carmen Urbano, enpresen garapen korporatiboan eta nazioartekotzean aditua eta Cocina Lab-eko arduradunak –ekimen honek ko-kreazioa herraminta gisa erabiliz Aragoiko elikagaiak sustatzen ditu– eman dio hasiera jardunaldiari “Elikadura-sistemen iraunkortasunerako erronkak eta aukerak” hitzaldiarekin. Urbanok azpimarratu du zenbait eragileen eta herritarren parte-hartzearen bidez, haien konpromisoa eta lankidetzarekin gizartearen erronkei aurre egiteko modukoak direla.

Jarraian, ‘Living labs eta hubs-ak gastronomiaren aldaketa iraunkorrean’ tituluarekin Inma Batalla (BC3 Basque Center for Climate Change), Fernando Martínez Peña (Cita Aragón) eta Berta Vidal-ek (Espigoladors) partekatu dute mahai ingurua, non metodologia parte-hartzailea, etengabeko berrikuntza eta hainbat esparrutako eragileen parte-hartzearen garrantzia azpimarratu duten. Jose Peláez LABe–Digital Gastronomy Lab-eko eraldaketa digitaleko eta berrikuntzako arduradunak moderatu du mahai ingurua.

Fermín Serrano Sanz ikertzaileak (Fundación IBERCIVIS) herritarren funtsezko rola azpimarratu du zientziaren garapenean eta aurrerapenean, maila guztietan. “Parte- hartzea eta sareak, hiritar zientzia” izenburupean, Serranok herritarren zientzia “oso interesgarria dela, batzuetan zientzia iritsi ezin den lekuetara iristen baita” defendatu du.

“Debatera eta gogoetara gonbidapena: lankidetza-sareak eraikitzen gastronomian jasangarritasuna lorzteko” mahai ingurua Bella Bowring (Gerald’s Bar) José Manuel Iglesias eta Lucía Calvo (La Despensa de Lujo), Denis Ugalde (Somos Oreka) eta Sandra Isabel Novok (Sostenibles Network) osatu dute. Besteak beste, honako gaiak landu dira: tokiko kontsumoa bertako ekoizleen bidez, elikagai-soberakinak birbalorizatzeko prozesuak, landa-eremua ureztatzea edo ekoizleen eta herritarren artean zubiak sortzeko tresna digitalak. Mahia ingurua Noemi de la Fuentek, BCC Innovation-eko negozioen garapeneko koordinatzaileak, moderatu du.

Elena Pitak (Fundación Biodiversidad), eman dio amaiera jardunaldiari “Jasangarritasuna ekinera eramaten: etorkizuneko erronkak eta hurrengo pausoa” hitzaldiarekin. Pitak azpimarratu du “etorkizuneko erronkak esan arren, gaur egungoak direla ulertu behar dugu”. Horrez gain, beste zenbait ideien artean, gastronomia jasangarria aipatu du, “osagaien jatorria, nola lantzen diren eta merkatuetara eta gure plateretara nola iristen diren kontuan hartzen duen sukaldea”, eta Biodiversidad Fundazioan egindako proiektu batzuk ere azaldu ditu, adibidez, “Pasture” proiektua edo “Naturaleza Pastoreada”, “ikaskuntza sustatzen duten edo talde-lana sustatzen duten” proiektuak.