Basque Culinary Centerrek gastronomiako 100 talentu gazteak aurkeztu ditu

Gaur hasiko da gastronomian eragin handiena duten talentu gazteen foroa. 100 profesionalek euren esperientziak partekatuko dituzte hitzaldiz, mahai-inguruz eta tailerrez osatutako bi jardunaldiren bidez. Foroaren inaugurazioan gastronomiako 100 talentu gazteen zerrenda aurkeztu zen.

Gastronomiako 100 talentu gazteen zerrenda egiteko irizpideak

Basque Culinary Centerreko taldeak gastronomiaren balio-kate osoaren talentu sektoriala ordezkatzen duten eta gehienez 30 dituzten 100 profesional gazteak identifikatzeari ekin zion, ondoren aurrekaririk gabeko foro batean biltzeko.

Helburu horrekin, profilak bilatzeko lanari eman zioten hasiera, eta honako hauek bilatu zituzten bereziki: euren alor edo funtzioetan ekintzailetza eta berrikuntza sustatu dutenak, aintzatespenen bat jaso dutenak edo proiekzioa duen karrera edo proiektu bat egiten ari direnak.

Bilaketa horren hasieran, goi-mailako sukaldaritzako espazioen jabeei (Michelin izarra dutenak eta/edo “The World’s 50 Best Restaurants” zerrendan daudenak) euren taldeetan talentua eta proiekzioa duten kideei buruzko kontsulta egin zitzaien, sukaldaritzan, aretoan, sommelier‑lanetan, I+G arloan, kudeaketan eta komunikazioan aritzen direnak. Halaber, jatetxeak irekitzen hasi diren sukaldari gazteak edo aretoko profesionalak, azken 2-3 urteetan nolabaiteko aintzatespena jaso duten edo sarietarako izendatuak izan diren sukaldari gazteak, ekoizleak, ardogileak eta enologoak identifikatu ziren. Azkenik, gastronomiaren balio-kateko hainbat esparrutan nabarmentzen diren gazteek eta bestelako profilek martxan jarritako gastronomiaren sektoreko startup berriak hartu ziren kontuan.

Profil horietako bakoitzetik, BCCko taldeak hautaketa bat egin zuen, sektore gastronomikoaren adierazgarri izango ziren profesionalak bilatuz, foroan haien kezkak eta ideiak azaltzeko asmoz.

Gastronomiako 100 talentu gazteen erradiografia

Zerrenda osatzen duten profesionalen erdia baino gehiago (% 52) Michelin izarra duten jatetxeetako taldeetakoak dira, eta horietako batzuk “The World’s 50 Best Restaurants” zerrendan daude. Horrek goi-sukaldaritzako espazioen funtzio finkatuetako bat islatzen du: talentuaren eta ekintzaile potentzialen harrobia dira, eta, baliteke, etorkizunean ekintzaile horiek euren negozio propioak irekitzea planteatzea.

Zerrendaren beste zati bat beren jatetxeak irekitzen dituzten (% 16) eta kasu gehienetan sukaldariak diren ekintzaileek osatzen dute, baita ekoizleek ere,% 11ko ordezkaritzarekin. Datu horrek agerian uzten du zerrendako 10 profesionaletik bat landa-eremuarekin lotutako jarduera batean aritzen dela. Ehuneko hori % 17ra igoko litzateke ardo-ekoizpenari dagokion % 6 gehituz gero.

Gainerako “talentuak” startupen (% 7) eta zientzia, ikerketa, aholkularitza, sukaldaritza, banaketa edo ingurune gastronomikoen komunikazioaren inguruko beste profil batzuen artean daude banatuta.

Espezializazio-arloari dagokionez, hautatutako gazteen % 37 “bakarrik” aritzen dira sukaldaritzan (% 43 sukaldaritza gozoa/gozogintza gehituz gero). Datu horrek agerian uzten du belaunaldi berriek dibertsifikatu egin dituztela beren interes eta espezializazio profesionalak, eta beste esparru batzuk ere lantzen dituztela, hala nola aretoa (% 16), kudeaketa-funtzio desberdinak (% 14), ekoizpen-jarduerak (% 11-12), ardo-ekoizpena (% 6) edo startupak merkaturatzea, teknologiaren bidez gastronomia-industriaren behar desberdinei erantzuten saiatzeko (% 7).

Badirudi, beraz, belaunaldi berriek hainbat irteera profesional planteatzen dituztela, eta agerian uzten dute une honetan lanbide asko daudela gastronomiaren barruan, eta ez sukaldariak bakarrik.

Profil horiek askotarikoak izanik, 100 talentuen zerrenda hori gastronomia-sektoreko tarte‑profesional gazteenaren erakusgarri izan daiteke, eta Espainiako gastronomiaren etorkizuna marraztuko dutenen profilaren gutxi gorabeherako erretratutzat har daiteke.

Programa kontsultatzeko eta gastronomiako talentu gazteen profilak ezagutzeko, ekitaldiaren eduki interaktiboaren bidez, kontsultatu esteka hau:  
http://bit.ly/forojovenestalentosbcc

Foroak Onekin, Hazi Fundazioaren eta Eusko Jaurlaritzako Ekonomiaren Garapen eta Azpiegitura Sailaren babes instituzionala, Martiko eta Mahou San Miguelen babesa eta Fagor Industrial, Arcos eta Aravén-en lankidetza ditu.

1. OHARRA: Forora joan ahal izan duten 100 gazteak baino ez ditu biltzen azken zerrendak.